صرخـــة إغتصـــاب..

العنوان موضح كتير انا عاوزه اقول ايه او..هقول ايه..
يمكن الوضح حساس شويه انى اتكلم فى نقطه زى دى لكن احساسى بالفزع كل ما بسمع شئ زى ده بيجبرنى كل يوم عن التانى انى اصرخ بصوت عالى واقول..((حسبنا الله ونعم الوكيل فى كل من ظلمنا وعادانا وآذانا....وحسبنا الله ونعم الوكيل فى كل سارق لاعز ما يملك الانسان بل كل ما يملكه..))
رد فعلى عن اللى بسمعه وبشوفه فى التليفزيون وبقراه فى الجرايد ..ومش بس كده وانا ماشيه فى الشارع بشوفه بيحصل لدى ولدى ولدى..

ايه اللى احنا بنسمعه ده..
ايه رد فعلك..؟
عادى ده بقى وللا ايه..؟

كل يوم اسمع عن خبر جديد..هو هواه نفس الخبر بس بطريقه جديده..
بنات..زى اى بنات..اللى عندها 20 سنه واللى متزوجه واللى منقبه واللى محتشمه واللى غير محتشمه..وحتى اللى عندها خمس سنيين مش عاتقينها..
ده انا يسرقوا مالى وكل حاجه عندى..ده انا يقعدونى فى الشارع ولا يسرقوا اغلى حاجه عندى..
المال بيروح وبييجى..والممتلكات بتروح وبتيجى..والدهب بيروح وبييجى..كل حاجه بتروح وبتيجى..الا الحاجه الوحيده اللى الانسان عايش عليها..اللى مخلياه رافع راسه بين الناس..اللى لو حد اخدها بدزن شرع الله يروح يموت احسن..يحط وشه فى التراب احسن..

طيب البنات اللى ملهاش زنب دى تعمل ايه..
ايه اصلاً الدافع اللى يخلى شخص وقح اى وقح بقى يرتكب جريمه زى دى..
فيه ناس بتقول البطاله..وانهم عاوزين يتجوزوا ومفيش فلوس ولا فيه شقه ولا فيه شغل..يقطع نفسه يعنى..؟
لااااااااء يبهدل فى بنات الناس..

ده اسمه عبط..
كلام وخلاص بيدارى بيه سبب شهوته..
بتشتهى لحاجه مش بتاعتك ليه وبتاع ايه..مين اداك الحق..انك تقتل دى وتسرق دى وتنتهك حرمات دى..
لأ بجد كتير..

البنت زنبها ايه تدفع تمن حاجه مش ليها يد فيها..بتدفعها تمن حاجه مالهاش صالح فيها ليه..واى حاجه دى اغلى حاجه يا اخى..اتقى الله..ربنا رقيب وشايف اللى انت بتعمله..جبت الشناعه دى منين وانت عارف ان ربنا شايفك ومع ذلك بتستمر..
انا نفسى الناس تفوق شويه وتفهم..ان احنا مش عايشين للجواز والشهوه بس..احنا عايشين لحاجات كتير..حاجات كتير مهمه غير القرففف ده..

الوضع دلوقتى اصبح علنى جداً..وبيحصل كل يوم..والاساليب اصبحت فيها فن..بيفننوا فى دى كمان..(تحصل باى طريقه وفى اى مكان وزمان..)
ده مبقاش فعل بس..اصبح كمان فى تحرش بالكلام..يعنى ان مكانش دى يبقى دى..
اهو بنتسلى واحنا ماشيين..مش ده اللى بيحصل..

كل ده ليه..؟..
استغفر الله العظيم ياربى..

خلاص يابنتى اقفلى على نفسك بابك ومتخرجيش..
هو ده الحل يعنى..؟لا ده مش حل..
ده فيه ادوات مخصووووووووصه بتفتح ابواب الناس وهى نايمه..استغفر الله العظيم..

ايه رايكم فى الكلام ده..
ها..؟
البنات تمشى مسلحه فى الشارع..؟
تلبس وش بيخوف وهى ماشيه..يمكن يتخض يطب ساكت وللا حاجه..

ده فى العيد اول يوم بس..50 حالة تحرش فى الطرقات العامه..

حسبنا الله ونعم الوكيل وفوضت امرى ليك ياربى
واسفه بجد انا دمى محروق لأقصى درجه..مش قادره استحمل المهزله دى..
وكل عام وانتم بخير ..

عارفه انها جايه متأخره..

أصدقائى وزملائى المدونين..
بعد غياب طويل جداً بكتب البوست ده..ومحرجه جداً وأنا بقوللكم كل سنه وانتم طيبين..
لإنها جايه متأخره قوى.. بس الحقيقه كنت مشغوله وبشده..
يعنى ظروف رمضان وما قبل رمضان..
لكنى معتزلتش التدوين زى ما البعض توقع ذلك.. بس والله غصب عنى..
انا مبسوطه قوى لانى وجدت ناس كتير انا بحبهم سألوا عليا فى غيابى..
بس فى كمان ناس كنت متوقعاهم متواجدين بس ملقيتهومش..
يمكن ظروف عندهم وده اللى هنعرفه لاحقاً..
بس ده برده ميمنعش ان فى عشم بينى ومابينهم..

أنا بقوللكم كل سنه وانتوا طيبين للمره التانيه..شهر رمضان ذكرى جميله بيتحيا جوايا..
بكل مافيها من ذكريات..سواء مؤلمه او سعيده..
شهر رمضان بجد مهما ان عملنا او جاهدنا فى حياتنا..مش هنقدر نعوضه..
علشان كده بنحاول نستثمر كل لحظه فى الشهر ده لانه شهر الخير فعلاً..
وتحسوا ان فيه روحانيات جميــله بجد..غير اى شهر تانى..
وياسلام بقى على ليلة القدر..جميله جميله جميله.. ليله بجد لا تعوض..
قال الله تعالى..
" ليـــلة القدر خيرُ من ألف شهر..تنزل الملائكة والروح فيها من كل أمر..سلامُ هى حتى مطلع الفجر.."
صدق الله العظيم..

فتخيلوا بقى ليلة القدر لما نكون كلنا بنصلى فى بذوغ الليل..
وتحسوا بالملايكه بتحف من حواليكم..بجد احساس رائع..

انا مش عاوزه أطول عليكم..انا فتحت مواضيع كتير بس بجد كان نفسى اتكلم معاكم من زمان..
ومفتقده التدوين بجد علشان كده عندى استعداد انى افتح مواضيع كتير..

بالحق..حسن حسفى صاحب مدونة sheva..بعتلى تاجين..
ان شاء الله يا حسن اوعدك فى اقرب وقت ممكن اجاوب على التاجين ان شاء الله..
كل سنه وانت طيب..

طمنونى عليكم..وكل سنه وانتوا طيبين جميعاً..

دمتم سالميـــن..

غيابـــى..

بسم الله الرحمن الرحيم..

الساده المدونين..

السلام عليكم ورحمة الله وبركاته..

انا بعتذر جداً جداً عن غيابى الفتره اللى فاتت..نظراً لضيق الوقت عندى..

وفى نفس الوقت بعتذر مره تانيه لغيابى الأيام المقبله لنفس السبب..

فأنا بطمنكم عليا انا الحمد لله بألف صحه وأحسن حال..

وشكراً جداً جداً للناس اللى سألت عليا فى الفتره الماضيه..

وأسفه إذا مردتش عليكم ولكن فى أقرب وقت..

بجد أنا بشكرهم جداً للإهتمام الكبير ده..وأنا مديونالكم بسؤالكم عنى..

بجد الدنيا لسه بخير..

فى أقرب وقت إن شاء الله هحاول أنزل بوست جديد بس أنا مقدرش أوعدكم لإن الظروف

بتغير أى مخططات الإنسان ممكن يعملها..

وبرده هحاول ازوركم لإنكم وحشتونى كلكم..لكن عندما تسنح الفرصه لى بذلك..

وأراكم على خير إن شاء الله..

لا حول ولا قوة الا بالله..

الحقيقه انا مش عارفه اقول ايه..

التيجان يعنى اللهم لا حسد..بتنزل مطره عليا.

يعنى الواحد أصلاً الاول محدش كان بيعبره بتاج صفيح حتى.

ودلوقتى ماشاء الله يوم ماينزلوا ينزلوا بالخمسه..خمس تيجان فى اسبوع واحد يابشررررر!!

لا اله الا الله ولا حول ولا قوة الا بالله..انا هيحصللى حاجه..

وبما انى وقتى هيكون ضيق فى الايام الجايه..انا قررت اخلص من الاربع تيجان اللى بعد التاج الاولانى.

واحلهم دفعه واحده..والظاهر ان الجن البنفسجى مشافش شغله معاكم..

استحملوا بقى لان الموضوع طويل..واللى يقراه يقراه اللاخر..

اللى باله مش طويل ميدخلش يقرأ حاجه..

بسم الله الرحمن الرحيم..

نبدأ بأول تاج من أختى نور شاهين..

الواجب :عبارة عن سؤالين ..
السؤال الاول ؟ أذكر 16 صفة من نفسك !!
1- بحب الهدوء..
2- بحب الناس..
3- مش عصبيه..
4- مستفزه..
5- عندى شويه حكمه..
6- بحاول اتقرب من ربنا..
7- مش عنيده..
8- بحب وقت الضحك والجد فى نفس الآن..
9- بحب الطبيعه بل وانى بعشقها..
10- كتير بكون طفله..
11- وكتير برده بكون ناضجه..
12- قلق رقم (1) فى البيت..
13- بحب تربية الأطفال..
14- بحب الرسم..
15- بحب اقف فى المطبخ جداً..
16- طموحه لأبعد الحدود..


والسؤال الثانى ؟ مرر الواجب لمن أحب !!
أمرر التاج..لميييييييين..؟
د/مونى..
بنت النيل..
Sheva..

التاج التانى جالى من أختى حبيبتى نعكشه..ربنا ينعكشك كمان وكمان..

بدأت التدوين من امتى ودخلت العالم ده ازاى..؟
التدوين بدأته من شهر مارس..انا فاكره اليوم ده كويس..
طبعاً اول مره اعرف ان فى حاجه اسمها مدونه وحتى مكنتش اعرف هى ايه..
وبعدين لقيت صديقه من صديقاتى بعتتلى مدونتها الالكترونيه..

ايه كان انطباعك فى البدايه..؟
تفحصت في المدونه بتاعتها..واتفاجئت طبعاً ان ازاى
اى شخص يقدر يعمل لنفسه صفحه ويب ويكتب فيها اللى هو عاوزه..وكنت فرحانه قوى
لان كده هقدر اعرض افكارى..ودى حاجه كنت بتمناها من زمان لما كنت بكتب افكارى فى
المفكره الخاصه بى..تملى كنت اتمنى ان الناس كلها تشاركنى ده..


مين اكتر واحد بتهتم بتعليقه فى البوست الجديد..؟
كل المدونين اللى بيهتموا بالبوست وبيقروه بإهتمام وبيردوا باهتمام برده..يعنى مش مجرد حلو وخلاص..

مين اتعرفت عليه من خلال المدونه ونفسك تتعرف عليه..فى الحقيقه..؟
اتعرفت على حنين وده لسه امبارح بس..
نفسى اتعرف على نعكشه ود/مونى ونور شاهين..وكل البنات..
وان شاء الله يحصل ..

ايه اهم حاجه اتعلمتيها فى عالم التدوين..؟
انى مش لازم اتخصص فى ميول واحد علشان اقراله..بل ولكن لازم اكون ملمه بكل المجالات..
وده فى حد ذاته وسع مداركى جداً..

ايه اكتر حاجه كرهتيها..؟
اه انا كان نفسى فى السؤال ده من زمان..والحمد لله انه جه لان اصلا انا كنت هعمل اجتماع للمدونين..
بالنسبه للموضوعات اللى بتكون محتاجه نقاش..يعنى انا بتعب نفسى وبفتح مجال مش علشان حد ييجى
يقوللى موضوع هايل وعقليتك متفتحه والحاجات دى..
انا بتمنى ان اللى ييجى يعلق يتناقش معايا لانى لما بفتح موضوع نقاش..الهدف الاول منه اننا نلاقى حل مع بعض..مش لمجرد ان البوست جميل وانتهت..
ودىحاجه انا مبحهاش من زمان حتى فى منتدى شباب عربى..بقيت اكتب تحت كل موضوع بكتيه..
الموضوع للنقاااااااااااش يا جماعه مش للمجاملات..وانا فى قمه شياطى..

ممكن تدى مثال عن اللى بتحلم تلاقيه..؟
شخص صادق مع نفسه..

حاسس ان التدوين له تأثير..؟
طبعاً له تأثير ومش مجرد احساس انا عندى يقين..ان التدوين بيوسع المدارك..
وممكن تكون ثقافه غير مباشره كمان..

طيب كلمه أخيره..؟
مش عارفه اقول ايه..بس انا عندى طلب..
ايه رأيكم لما كلنا كل المدونين..نصوم ايام الاثنين والخميس والثلاث ايام القمريه..
وده يبقى فى حد ذاته رابط جميل قوى..

التاج التالت والرابع جالى من أخى فارس بلا جواد..وأنا بشكره الحقيقه لإنه مش سايبلى

فرصه اخد نفسى..سواء فى المنتدى او المدونه..وأحب أقولله ليك يوم تقعد فيه على الكرسى..

نبدأ فى التاجين..

التاج التالت..

سبع حجات نفسى اعملهم ؟
نفسى اروح القافله اللى عملاها جمعية رساله..
نفسى اعمل تورته عدله زى باقية الخلق..
نفسى اجيب تقدير عالى السنه الجايه ان شاء الله..
نفسى اقف قصاد البحر شويه..
نفسى العب (هبله انا مش كده؟)..
نفسى أركب على فرسه بيضه..وتكون على شعرها ورده بينك..
(مش بقوللكوا هبله..؟)
نفسى الاقى مكيده للشيطان لانى متغاظه منه من امبارح..ونيمنى من غير ما اصلى الفجر..


سبع حاجات معرفتش اعملهم؟
معرفتش ادخل كليه الفنون التطبيقيه..
آخر مره عملت فيها تورته طينت الدنيا..
معرفتش اوفق ما بين اعز اصدقائى وبين بعضهم..
معرفتش اكون قاسيه بالقدر..
معرفتش اصلح الكاسيت بتاعنا..يعنى عملت فيها فزلوكه وقلت هصلحه..
معرفتش اشيل الفيروس اللى على الجهاز ومطلع عينى..
معرفتش لسه اوفى حق والدتى..ومهما عملت برده مش هعرف.


سبع حاجات بقولها دايما ؟
استغفر الله العظيم يارب..
انتى عاوزه تتضربى باين..
يا ربىىى(دى لما بكون مخنوقه قوى..)
لا حول ولا قوة الا بالله..
اعمل فيكى ايه؟
الله يصلح حالك..
ربنا يكرمك..

سبع حاجات تحلهم الفلوس..
ايه حكاية السبعه بالظبط..

لعب كتير لأيتام جمعية رساله..
دراستى اللىمصاريفها مبتخلصش..
هديه لاخواتى لما اجى استقبلهم فى المطار..
عزومه كبيره اعملها لأصحابى ..(وااااااو هتكون جامده..)
طبيعى لازم لما اشترى حاجه يكون معايا فلوس..
اشترى لماما هديه..
ارد دين اختى واردلها المصروف اللى بتديهونى..ههههههههه..


سبع اماكن بحبهم ؟
بحب بيتنا جداً..
بحب ادخل المطبخ بشراهه..
بحب افتح التلاجه..
بحب البحر بطريقه غير معقوله..
بحب اسكندريه..
بحب اى مكان فى ناس..

كفايه كده مش لاقيه حاجه تانى احبها..


سبع اشخاص بحبهم غير بابا وماما واخواتى ؟
صديقتى..
حنين بنت اختى الكبيره
اكرم ابن اختى الكبيره برده..
لمى بنت اختى اللى بعدها..
جورى بنت اختى اللى بعدها برده..
خالتى ..
بنت شفتها فى معهد الأورام..


سبع حاجات بحبهم اوى ؟
بحب الموسيقى الهاديه جداً..
منتدى شباب عربى..
الورد..
الحياه..
التفاؤل..
الأنيميشن بموت فيه..
المدونه..


سبع مدونات بتحبهم اوى ؟
كل المدونات اللى على الشمال دول..
ايوا ايوا هما اللى انت بتشاور عليهم..
كلهم بحبهم جداً..

وأهلا بكم فى أجمل 7 الساعه 7..مع مياده رفعت عمرك ماهتزور مدونات..

انا هشيل رقم 7 ده من الحساب خالص..

التاج الرابع وهو برده من فارس بلا جواد..

اية معنى السعادة من وجهة نظرك؟ حاسس انك سعيد ؟
السعاده من وجهه نظرى هى انى اكون راضيه بكل شئ..
ومعملش مشكله من لا مشكله..السعاده جوهريه جداً ولا تقدر بمال..

انا سعيده جداً فى حياتى على الرغم من المآسى اللى بتواجهنى..


امتى حسيت انك ظلمت انسان ولية ؟ محتاج للحظة غفران منة ؟
لأ انا الحمد لله حتى الآن مظلمتش حد ..على العكس..
ولكن اتمنى ولو انى اكون مظلمتش اى شخص سواء بعيد او قريب وانا مش واخده بالى..
ويغفرلى ظلمى ليه..

ويابخت من بات مظلوم ولا بات ظالم..



بتعمل اية لما تكون مضايق بعد ما تصلى ؟
معتقدش انى بعد ما أصلى ابقى متضايقه..
احلى حاجه انى اقابل وجه الله الكريم ووقتها بيزيل كل هم وضيق..


امتى حسيت انك اتظلمت ؟ولية ؟
كتير..
وليه برده دى كتير..


امتى ممكن تتنازل عن حق من حقوقك ؟ والسبب ؟
اتنازل عن حق من حقوقى لما يكونى غيرى محتاجه أكتر منى..
والسبب انى بإمكانى اتنازل عنه ويعودلى فى حاجه محتاجاها قوى..
يعنى ربنا بيعوض..

التاج الاول خالص..لـ د/مونى..وشيفا..وبنت النيل..

التاج الثانى..ههديه لـ فارس بلا جواد..والملاك..

التاج التالت والرابع بهديه لـ نعكشه..و حنين..وساره جبالى..

الحمد ليك والشكر ليك يارب..
يااااااااااااااااه 5 تاجات فى يومين..

معدش حد يبعتلى تانى حاجه ..

وربنا يصلح حالكم جميعاً..

وإلى اللقاء مع بوست آخر..بس ان شاء الله مش هيكون تاجى..

الرحمه حلوه برده..

سلامى للجميع واتمنى مكونش طولت عليكم..

زمـــاااااااان..

وأنا صغيره..من حوالى 10 سنين..أو يمكن أكتر..كنت أى نعم صغيره بس داركه الدنيا..وكنت بشوفها بشكل تانى خالص..
فى رمضان مثلاً كنت أطلع البلكونه بتاعتنا أسمع القرآن اللى قبل المغرب..وأقعد أتفرج على شباب الشارع وهما متجمعين بيلعبوا كوره ومستنيين الفطار..
وأرمى بعينى على ناصيه شارعنا ألاقى الراجل بتاع العرقسوس البسمه على وشه..بيقرأ قرآن..ولما حد ييجى يشترى منه اسمعها بودنى.."كل سنه وانت طيب..ربنا يديك الصحه"..

تطلع بره شويه تلاقى الراجل بتاع الكنافه..ونفس البسمه على وشه كل اللى يعدى عليه يقولله..

"كل سنه وانت طيب..انت فين يا راجل من زمان"..

وقبل رمضان بيوم كنت أطلع البلكونه الصبح اتفاجئ..وأصاب بالزهول..كل ده ذواق..الله الله..والفانوس الكبير مكتوب عليه..

"رمضان كريم..وكل سنه وانتم طيبين"..
والاقى العيال الصغيره فرحانه بالفوانيس وبتلعب بيها..ويلفوا حوالين بعض..ويقولوا.."حاللو يا حاللو رمضان كريم يا حاللو"..
انا لحد الأن مش عارفه يعنى ايه "حاللو" دى..بس حساها كلمه جميله قوى معناها أجمل..

وطبعاً ده غير التليفزيون وإحتفالات رمضان الجميله..ومسلسلات بوجى وطمطم اللى انقرضت وسلاحف النينجا القديمه..اللى انقرضت برده..والبرامج الدينيه وغيره وغيره..

تعالى شوف بقى دلوقتى..معدش الاهتمام برمضان زى الاول..ممكن الشارع ده معدش بيتزوق نهائى..ومفيش ناس وجيران لبعضها زى الاول..أه بشوف مشاهد رمضانيه على خفيف بس انعدم الاحساس بيها لإنها مشاهد مش نابعه من الداخل..
تعالى بقى نتفرج على التليفزيون كده..
مسلسلات مالهاش اى علاقه برمضان..ومشاهد يمكن لا تبت بصله لرمضان يمكن ألعن من الافلام..
وكنا بنقول المسلسلات أكثر احتراماً..ده فى العادى..
الظاهر ان رمضان بقى عادى..

دى الظاهره الوحيده اللى حسيت بيها وانا صغيره وانعدمت..
تعالى نشوف الظاهره اللى انتهت من قبل ما اتولد..

ماما كانت تحكيلى ان ايام زمان..زماااااااااان قوى..وهى كانت شابه مثلى..
قالتلى ان زمان ده حاجه تانيه مختلفه كلياً وجزئياً..
الدنيا كان فيها أمان ودفئ..كان فيها روح حلوه..
البنت كانت تمشى فى الشارع بالليل لو عدت على مليون ولد تحط وشها فى الارض وهما كذلك..

ويوسعولها الشارع كمان علشان تعدى..

دلوقتى لو بنت وولد واحد والصبح يا عالم..ميسيبهاش فى حالها..
حتى المقاريض الصغيرين اللى ممكن تلعب معاهم او تضحكلهم وانت ماشى ضحكه دعابيه كده..بقوا بيعاكسوا..هههههههه..والاقى المقروض الصغير ده يقول"يا حلو انت يا حلو"..هههههههه..

كانت ماما تحكيلى كمان ان ايام زماااااان..العيله كلها تتجمع لازم تتجمع حتى لو فى مشغوليات كتيره بيخصصوا ايام لازم يتجمعوا فيها..

دلوقتى..تعالى نشوف..
كل واحد فى حاله ويمكن محدش بيفكر يسأل على حد حتى لو كان تعبان..والترابط انعدم..
انا واحده من الناس عيلتى يمكن مبشوفهاش الا فى الاعياد بس..وتشوفهم يقوللك "انت مبتجيش ليه..؟"..


زماااااان..ماما كانت تحكيلى عن البركه اللى انا معرفهاش وملمستهاش..
الحاجه كان فيها بركه والوقت كمان كان فيه بركه..
كنت تمشى فى الشارع او السوق مثلاً تلاقى خيرات ربنا محاوطاك من كل جانب وريحتها جايبه لآخر الشارع..
الفراوله فراوله..والخيار خيار..والبرقوق برقوق..

دلوقتى فى تطور ههههههه..
ممكن تلاقى خوخ بطعم المنجه..ودى حقيقه فعلاً إشتريت خوخ على اساس انى بشترى خوخ يعنى..
روحت البيت باكل الخوخ ملاقيش خوخ..منجه خالص وانسجه المنجه..كنت مزهوله الحقيقه..!!
إزاى يعنى انا شاريه من الراجل خوخ يا ناس مش منجه..
البطيخ..فى البلاد الاجنبيه المتقدمه بقوا بيرزعوه مربع مش مدور زى اللى عندنا ده..اللى عندنا ده دقه قديمه..
"هرمونات وأسمده بقى..وربنا شايفهم وآخرتهم سودا ان شاء الله"..


تفتكروا لما أكون أم ويكون عندى أحفاد..هحكيلهم على الجيل الفاسد اللى انا كنت عايشه فيه ده..وأقوللهم زمان برده..؟
مفتكرش..
هحكى على اللبن المغشوش..وللا انعدام الاحساس بالامان والمروءه..وللا قله البركه فى الوقت وقله الخير..وللا عن طمع وجشع الناس..وللا قله الروح الطيبه وللا ايه وللا ايه..


آسفه طولت عليكم..لكن الحقيقه كنت بحاجه انى اتكلم معاكم عن زمااااان..لإنى بحاول أخليها تحيا من جديد..

تقبلوا تحياتى..

دمى إتحرق..!!

اليوم الأربعاء..الموافق..15/7/2008..
الساعه حوالى..امممممم..9.02 مساء..بعد مافطرت..
قاعده فاضيه قلت أكتب..بس مش عارفه أكتب إيه.. اللى أنا أعرفه إن كل شئ تمام فى البيت هنا..وأعتقد مشغولياتى مخلصاها على خير..

فكرت قلت أكتب..بس الكلمه بكتبها فى ساعه..أكتب كلمه وأطلع الشباك أتفرج على الناس وأدخل أكتب كلمه..وهكذا..

"منا فاضيه بقى.."
حتى خواطرى فارغه..

بس هكتب عن اللى انا شايفاه بعينى..
شايفه حاجه تحرق الدم..الناس ماشيه وخلاص بالرغم من الهموم المتعلقه بكل شخص لكن مبيتعلموش..!!
ماشيين أساساً اه عارفين رايحين فين بس فى نفس الوقت مش عارفين ومش داركين..
عادى بالنسبه لهم..
الحياه حلوه خالص..لا فى حروب..!!..ولا فى أحداث..!!..ولا فى أطفال مشرده..!!..
ولا فى ناس مبتنمش الليل..!!..ولا فى حد بيموت فى لحظه..!!..فى ثانيه بيتخطف..!!
طيب نعمل ايه..؟

مفيش حاجه حصلت ومفيش جديد أصلاً..ياعينى عليك يابنى وخلاص انتهت..
أنا بشوف حاجات فى الدنيا تخلينا وتجبرنا بجد اننا نفكر فى الحياه دى ماشيه ازاى..
بغض النظر عن الغلاء والكلام الفارغ ده..
للدرجادى كل هم الناس أكل وشرب..؟!

اللى انا شايفاه..ناس عايشه علشان الدنيا بس..منظر على ورق وبس..يعنى بيعملوا للدنيا..
وربنا سبحانه وتعالى يدعونا علشان نبنى رصيد للآخره..
ربنا سبحانه وتعالى بيبعتلهم رسايل كتير لصلاح الدين والحال..
بس مش عارفه دول أسميهم أغبيا..؟
وكل مدى بيزيدوا فى الفُجر أعوذ بالله..أصل الممنوع مرغوب..ويقوللك متخنقينيش..
بيفكرونى بأيام الجاهليه الأولى..بالظــــبط مختلفوش كتير..حتى لبس البنات مختلفش كتير برده..

ولما تيجى تكلمهم يقولولك ده الموضه..طيب محنا بنمشى على الموضه برده..

احنا جايين من ولايه "تحت الشجره يا وهيبه.."مثلاً.؟

زى مايكون يوم لقاء ربنا ده مش موجود فى حساباتهم خالص..
وممكن يكونوا داركين ..بس تحس انهم بيستعبطوا..بيستهبلوا..امممممم هتجنن..
أنا واحده من الناس بحب الحياه وبقدسها..بس شويه كنترول بقى..فوقوا بقى..
الناس دى بجد حرقتلى دمى..

أتمنى مكونش طولت عليكم بس كنت مضطره إنى أكتب البوست ده..لإنى بكل بساطه" دمى إتحرق.."

أحـــلامى..

فى أوقات كثيره أشعر أننى أحلق فى الفضاء..أسرح ..أرى أشياءً لم أرها من قبل..

وأشعر بشعوراً لم أشعره من قبل..

أرى نجوماً وكواكب تحلق هى الأخرى حولى..وأراها تبتسم لى..كما أراها الأن..

نعم..أنا أراها تبتسم لى..هناك..هناك..أرأيتم ما أراه!!!!!



أرى عصفوراً جميلاً يطوف حول شرفة منزلنا..يطوف ويطوف..

ويصدر أنغاماً ياااااااااا لروعتها وجمالها..إننى الآن أستمعها جيداً..أتسمعون..

إنها أصوات رقيقه وحالمه..تدلى وكأنها عصافير الجنه.."اللهم أرزقنا حسن الخاتمه"..

أتسمعون..؟!..إنها تغنى..أنا أسمعها..تغرد هناك..!!!!!!



أرانى على حصانُ أبيض..ليس بشرط مع فارس أحلامى..ولكن ما أراه الآن أننى على هذا الحصان..

إننى هناك..أترون ما أراه..

أرى نفسى أطير مع حصانى الأبيض فى جزيره بعيده عن هذا المكان..

بعيداً عن الوحوش الآدميه..بعيداً عن الكره والحقد والكذب والنفاق..

بعيداً عن الظلام..



أتنفس رائحه النسيم الجميل..نعم أتنفسه إنه يشبه النفس الطويـــــل الذى لم أجربه مره بحياتى..

أتعرفون رائحه النسيم..؟!

إنها رائحه لا يعرفها إلا من يرى الحياه بشكل آخر..

يراها دائماً متفتحه جميله وحتى ولو كانت بها كم من الأحزان..فإنها تظل عالقه..تلازمك فى كل الأقدار..



أرانى وفى يدى ورده حمراء..ولكنى لا أعلم حتى الآن من أين اتت هذه الورده..ومِن مَن..؟!!!!!

فى كل حلم لى أراها ولكن حيرتى زادت..

من أين هذه الورد..؟!



أرانى أرجع بعمرى..طفله صغيره..فى يدى لعبه جميله..

وفى شعرى ورده..ولا أحلم بشئ سوى أن أرى أمى بجانبى وأنا أنام..



أرى أشياءً كثيره..لا أستطيع وصفها..

هذه أحلامى التى أشعر بها الآن..

ونلتقى قريباً إن شاء الله..

إلــــى اللقاء..

*

*

*

أحمدك ياربـــــــــــــــى..!

الحمد لله انى ليا كيان..الحمد لله انى بلاقى اكل باكله..غيرى مش لاقيه..
وان لاقاه النهارده بينام وهو خايف لا ميلقيهوش بكره..
خايف بكره يكون اصعب من النهارده..
خايف يشوف الدنيا بقت ظلام كاحل..


الحمد لله انى بشرب لما بحس بالعطش..الحمد لله ان فى بلعوم واجهزه جوايا بتساعدنى انى اشرب والدوره بتكتمل جوه جسمى وانا مش حاسه..

الحمد لله انى اتولدت فى الدنيا ليا اسم ليا اهل..ليا عيله..
فى ناس مولودين يتماء..لقطاء..
فالحمد لله..

الحمد لله انى ليا عين بشوف بيها..بعرف امشى واروح واجى وأشوف وأتفرج..
وأتمتع بجمال الطبيعه اللى ربنا خلقها..وشايفه الدنيا جميله..
عارفه شكلى ايه باكل ايه الناس شكلها ايه..بمشى ازاى.
وفى غيرى ربنا يشفيهم كفيف مش بيشوف..
محروم من نعمه اسمها نور..محروم من انه يشوف يعرف يتمتع بنعمه عمرها ما هتتعوض ولو بكنوز الدنيا..
بس سبحان الله الناس دى جواها نور ونقاء وصفاء..
فى الاخره هيشوفوا نور منقدرش احنا نشوفه..


الحمد لله انى ليا ايد ببطش بيها..باكل بيها..
بكتب بيها..بسبح بيها..برفع السبابه وأشهد ان لا اله الا الله
وان محمداً رسول الله برده بيها..
بمسح دمعتى بيها..هساعد امى بيها..بلمس بيها وبحس بيها..



الحمد لله ليا اذن بسمع بيها..
وغيرى محروم من نعمه اسمها صوت..
وبيتعامل بالاشارات قد تكون مجرده من الاحساس..


الحمد لله ليا لسان بتكلم بيه وبعبر بيه..بعرف انطق الحق بيه..
وانهى عن الفحشاء برده بيه..
غيرى عنده لسان بس مبينطقش الا بالزور والكدب والغش والخداع..
مبينطقش الا بالباطل..
وفى برده غيرى مش عنده لسان ينطق بيه ولا هو عارف يعبر هو ماله وتايه وتعبان..




الحمد لله يارب..اعطتنى عقل ميزتنى بيه عن الخلق..
الحمد ليك اننا اتخلقنا خلفاء فى الارض..
مش حيوانات ولا جماد ولا حاجه تانيه..


والحمد لله ربنا هادينا..وتملى بنلاقى فى رسايل من عنده بتمهدلنا ان اللى بنعمله ده
نهايته وحشه قوى..ارجع عن اللى انت فيه وارجع لربنا..
فى ناس..ربنا مبيهديهاش..سايبها كده بتطيح فى اهل الارض..
سايبها تضغى فى الارض..
وللاسف بيموتوا ضالين سفهاء غير مهديين..


وأخيراً وهى أهم حاجه فى اللى انا قلته..
الحمد لله ياربى اننا مسلمين..الحمد لله اننا مسلمين..



اتمنى مأكونش طولت عليكم بس بجد كل كلمه انا كتبتها كنت حاسه بيها قوى قوى..
فهل كل ده مقمتش من نومك وتقول الحمد لله على نعمك الكثيره..؟!
أعتقد يبقى عيب قوى..

أسئله عاديه وطبيعيه إذا كنت طبيعى..

-لماذا عندما تكون بطارية (الريموت كنترول) ضعيفه نقوم بالضغط بقوة على الأزرار؟؟

يعني بنشحن البطارية!!؟؟

ـ لماذا نخفض صوت المسجل أو (الراديو) في السيارة عندما نشعر بأننا دخلنا بالطريق الخطأ؟؟؟

يعني كذا بنصير نعرف الطريق الصحيح!!؟؟

ـ لماذانقول هدية مجانية؟؟

وهل يوجد هدية غير مجانية!!؟؟

ـ لماذاعندما نكون داخل المنزل والسماء تُمطر نتسائل: هل السماء تُمطر برا؟؟

يعني بحياتها أمطرت جوا مش برا!!؟؟

ـ لماذاعندما نقرأ على الحائط ـإحترس من الدهان-لا نصدق بل نجرب ذلك بأصبعنا؟؟

يعني اللي دهن الحائط لازم يحلف!!؟؟

ـ لماذا عندما توقف سيارتك في موقف خالي من السيارات ييجى واحد بعدك ويوقف سيارته بجانب سيارتك؟؟

يعني يسيب الموقف كله ويوقف جنبك!!؟؟

ـ لماذا عندما يتأخر المصعد نضغط عدة مرات على الزر؟؟

يعني هكذا بيستحي على دمه ويجي بسرعة!!؟؟

ـ لماذاعندما تكون منتظراً المصعد ويأتي شخص آخرتجده يضغط الزر أيضاً لطلبه؟؟

يعني مش شايفك بالمرة!!؟؟

ـ لماذانفتح فمنا عندما نقوم بإطعام الطفل الصغير؟؟

يعني إحنا اللي ناكل وللاهو!!؟؟

ـ لماذانشعر دوماً بأننا بحاجة إلى 10 دقائق نوم إضافية كلما استيقظنا صباحاً؟؟

يعنى النوم ده كله والـ10 دقايق دول اللى هيعملوا حاجه!!؟..

ـ ليه لما تكون قاعد في مكان عام وتسمع رنة هاتف جوال على طول تطلع جوالك..؟؟

ليه أنت حضرتك مهم كثير حتى يرن (موبايلك)بين كل هالبشر!!؟؟

ـ ليه وإنت بتقرا الرساله دى دلوقتى تبتسم...؟؟

يعني اللى كاتبها بيشوفك..!!؟

ـ لماذا يصعب علينا قول الحقيقة بينما لا يوجد أسهل من قول الباطل...؟؟؟

على أساس ان الباطل ده حاجه حلوه مثلاً..

ـ لماذانشعر بالنعاس ونحن نُصلي.. ولكننا نستيقظ فجأة ونشعر بالنشاط فور انتهائنا من الصلاة ؟؟؟؟؟

ـ لماذانسهر الليل كل يوم من أجل مباراة في كرة قدم أو مشاهدة فيلم أو مجالسة صديق ولا نسهر بقراءة القرآن أو الصلاة؟

ـ لماذانستيقظ باكراً من أجل العمل ولا نستيقظ من أجل صلاة الفجر؟ ـ لماذانخشى مراقبة الناس لنا ولا نخشى مراقبة الله؟

ـ لماذانُنفق الأموال الكثيرة للمتع والرحلات مع أنها زائلة، ونبخل بالصدقات على الفقراء مع أنها باقية؟

ـ لماذايصعب علينا الكلام عن الله تعالى وأمور الدين... ويسهل علينا الكلام عن باقي الأشياء؟؟؟؟؟

ـ لماذانقول أننا نُحب الله ونحن نعصيه..؟؟ ونقول أننا نكره الشيطان ونحن مطيعين له ومطأطئين رؤوسنا لجنده؟

ـ لماذانحس بالملل عند قراءة مقال ديني... ونشعر بالفضول عند قراءة مقال عن أي شيء آخر؟؟؟

ـ لماذانمسح الرسائل الإلكترونية التي تتحدث عن الأمور الدينية... ونقوم بإعادة إرسال الرسائل العادية؟؟؟

ـ لماذانُحب سماع الأغاني بسياراتنا...؟؟ ونكره سماع القرآن فيها. ؟

ـ لماذا نرى أن المساجد أصبحت شبه مهجورة... وأن المقاهي والاستراحات والملاهي أصبحت عامرة؟؟؟

ـ لماذا لا نُحب من ينصحنا ويُريد لنا الجنة...!!؟؟ونبتعد عنه ونُحب من يقودنا إلى الهلاك ونتقرب منه وإذا افتقدناه نبحث عنه؟؟؟

ـ لماذا نذكر عيوب الناس دائماً وننسى عيوبنا؟

ـ لماذا نبكي من أغنية صد وهجر ولوعة ولا نبكي من خشية الله؟

ـ لماذانغضب إذا انتُهكت حرماتنا ولو بكلمة..؟؟ ولا نغضب من انتهاكنا لحرمات الله...؟؟ فكر بالأمر، هل ستفكر فيما قرأت ملياً؟؟
هل ستحاول أن تغيّر حالك؟؟

أم ستكون إمعة وتقف كببغاء تُردد وتتبع ولا تعرف أن تقود أحداً حتى نفسك.؟

ضع شيئاً واحداً في بالك فقط هو أن الله يُراقبك وستموت وحدك وسوف تُسأل وحدك وستُبعث وحدك وستدخل الجنة أو النار وحدك فمالك ومال للناس ماذا يفعلون؟

أنجُ بنفسك فطالما حرصت فيما فات فمن المؤكد لو أن نفسك تتحدث لقالت أرجوك لا تلقيني في النار. دعنا نرى إن كان باستطاعة الشيطان أن يتصدى لشيء كهذا هذه المرة عندما تصلك هذه الرسالة،

( سبحان الله وبحمده سبحان الله العظيم )..

( لا إله إلا أنت سبحانك إني كنت من الظالمين)..

(أستغفر الله الذي لا إله إلا هو الحي القيوم وأتوب إليه)..

إذا ضاقت بك الدنيا فلا تقل: يا رب عندي هم كبير... ولكن قل: يا هم لي رب كبير..

قل هذه الكلمات الحلوة اللهم صلي على محمد وعلى آل محمد كما صليت على إبراهيم وعلى آل إبراهيم إنك حميد مجيد وبارك على محمد وعلى آل محمد كما باركت على إبراهيم وعلى آل إبراهيم إنك حميد مجيد ..

لقيتها رساله هادفه وبسيطه فى نفس الوقت قلت (أضيفها لمدونتى المفضله)..

وسلامى للجميع..

مــــــــــــاشى يا زمن..

أحلام..

صعاب..

أوهام..

صدمات..

أحزان..

ومــــــــــــــــــــــــــــــــــاذا بعد؟

لماذا نحلم وتواجهنا الصعاب..؟
لماذا نعيش فى الوهم فتره طويله فتقابلنا الصدمات ضرباً..؟
لماذا نحزن دائماً عندمـــــــــــــــا..تواجهنا الصعاب و..تضربنا الصدمات..؟

هل تستطيع أن تعيش بدون.........الحلم؟
هل تستطيع التخلى عنه بعد سنين وعمر طويل؟
هل تستطيع أن تتغاضى عن النظر إلى الحياه..؟
وأخيراً..هل تستطيع أن تنسى وتتلاشى عن ما قلته الآن..؟

سلامى للجميع..

متى تغضب..؟

بعد أن ضاعت القيم والمبادئ........متى تغضب؟

بعد إستحلال الحرمات ودماء المسلمين..........متى تغضب؟

بعد هيمنه اميريكا وإسرائيل على الدول العربيه والإسلاميه.........متى تغضب؟

بعد إحتلال فلسطين الحبيبه لأكثر من خمسون عاماً وإباده شعبها المناضل على مرور الأزمان........متى تغضب؟

بعد إتهام الدول العربيه والإسلاميه بالإرهاب ظلماً وعدواً.........متى تغضب؟بعد إحتلال العراق وإستباحه حرماتها والقضاء على العلماء والحضاره العريقه فيها بدعاوى كاذبه وهى الإرهاب وأسلحه الدمار الشامل التى لم يجدوها ولكنها حجج واهيه للإحتلال.........متى تغضب؟

بعد التدخل الأجنبى فى شئوننا نحن المسلمين ومحاوله الهيمنه علينا والتدخل فى تغيير مناهجنا الدينيه الأصيله بدعوى أنها تحرض على الإرهاب...مثلاً آيات الجهاد ضد الكافرين وضد المحتلين يدعون أنها تحرض على القتل والإرهاب ويأمروننا بحذف هذه الآيات الكريمه..

(لا ينهاكم الله عن اللذين لم يقاتلوكم فى الدين ولم يخرجوكم من دياركم أن تبروهم وتقسطوا إليهم)..صدق الله العظيم...ومع ذلك الإستفزاز للمسلمين زاد وفاض وخاصه هذه المرحله الحرجه فى حياه كل مسلم وهذا الصمت العالمى الظالم والسائد على فلسطين وخاصه غزه الصامده الذى يروع أبناؤها ليلاً ونهاراًً من الكفار أعداء الدين وأعتى دول الشر أميريكا وإسرائيل (تباً لهم).إنهم ليسوا يحاربون جيشاً مجهزاً بالعتاد والدبابات والطائرات والتقنيات الحديثه...إنما يحاربون شعباً أعزل نساءً وأطفالاً وشيوخاً ، يرمونهم ليلاً ونهاراً بالطائرات والدبابات والصواريخ والقتابل المحرقه...متى تغضب؟

يروعون الأطفال والنساء تحت مسمع وبصر العالم كله...العالم كله مشترك فى هذه المهزله بصمته المميت..فمتى نغضب.....متى نغضب ....متى نغضب؟!!!!!!!!!!!!!
متى نغضب؟.....حين نرى أطفالاً جائعين مشردين مشتتين، البيوت تهدم على رؤوسهم وهو أحياء..
متى نغضب؟.....وحين نرى الشيوخ والسكاله والآله العسكريه المتغطرسه الإسرائيليه تروع الآمنين ليلاً ونهاراً.

متى نغضب؟.....حين نرى الأمه الإسلاميه تنهدم شيئاً فشيئاً ونحن غافلين لاهين فى أمور تافهه ليس لها معنى ولا قيمه بجانب ما نمر به الآن لمجرد أننا منشغلين...عن أى شئ ننشغل؟.

متى نغضب؟.....على أنفسنا...على أرواحنا...على حياتنا..

والكارثه الكبرى التى حطت على جميع الدول العربيه المسلمه...الإساءه إلى حبيبنا المصطفى صلوات الله وسلامه عليه..رسومات لا يعلمون لماذا يتكلمون عنها لأنهم يصابون بالجهل عن معرفه رسول الله ، والأصعب والأدهى أن يجئ صعلوك عربى ليتبادل معهم الرسومات والكلام والفضفضه النجسه.هل هذا هو غضبنا...كلام كلام كلام...وماذا يفعل الكلام أين الفعل؟..اليس موجود فى الحياه (كلمه فعل)ام أنها مجرد وهم يحلق فى السماء؟..فحدثونى ماذا فعلنا؟
تكلمنا؟!..لا فائده ولا جدوى..لابد وأن يكون بداخلنا أفعال مثبته ليس مجرد كلام فى الهواء.

فلنقاطع فلنقاطع!!..أين المقاطعه هذه وأنا حتى الآن أرى مثل هذه المنتجات فى كل مكان..أين الساسه من كل هذا..
أنضحك على أنفسنا بمعاهده سلام؟..لا ثم لا ثم لا..هؤلاء القوم لا يعرفون معنى سلام..بل يعرفون معنى هدم ، سفك دماء ، هيمنه ، إعتداءات ، قضاء على حقوق أمه بأكملها أو قضاء على العالم بمعنى أفضل..وكأن هذا العالم مجرد قرص حلوى يقسم ويقطع مائه قطعه بأى آله أى ان كانت(اللى عاوز بقى)..حتى قرص الحلوى يقطع بلين وحذر(يا لعجب هذه الدنيا..!)..وهؤلاء سفك دماء،قتل أرواح أبرياء نساء شيوخ أطفال شباب..كل ما تتخيلون...فمتى متى متى نغضب؟
أسفاً علينا..أسفاً على قدوتنا..أسفاً على كل شئ إن لم نغضب الغضب الحقيقى..وااااااأسفاه فلقد أصبت بالقهر والحزن المميت وهناك إناس لا فرق معهم إعتداءات ولا إساءه ولا ضياع أمه ولا أى شئ..إنه بالفعل لأمر محزن.
وسؤالى...هل نغضب حين يمسنا الضرر الحقيقى؟...

فى اى حال من الأحوال فإن الضرر آتٍ آت..عاجلاً أم آجلاً...أبيتم أم لم تأبوا....فلماذا كل هذا الصمت..هناك كرامه وهناك عزه قوم فلماذا الصمت وسأظل أقول بعِلُو الصوت...

متــــــــــــــى تغضب؟.

حاجه تضحك والله..

مين دول..ايه ده ومين ده كمان..لالالالالالالالا..
وده من ايه ان شاء الله..لا حول ولا قوه الا بالله..ربنا يشفى..
هههههههه ايه اللى انا بقوله ده.. مين ده ايه ودول مين اييييييييه؟..
اسكتى خالص الناس تفتكرك مجنونه..
يا اما الناس اللى فيها يا اما انا..


الناس جرى فيها إيه؟
يعنى علشان تتكلم مع شخص ما لازم ياخد عنك انطباع انك محدششش يجرؤ ويلعب بديله معاك..
ولإنك هتوريله العين الحمرا لو عمل حاجه..يقوم هو ياخد باله من تصرفاته ويمشى زى الألف..
طيب وليه من الأول..الطيب أحسن برده..
بجد والله أنا بستغرب جداً..ليه يعنى نعمل الأفلام دى كلها..علشان مينضحكش علينا..ومالها طبيعه الإنسان..الهادئ الحالم المحب للناس ..الطيب الخجول المتسامح..الكريم..
وتخيلوا ممكن يتغاضى عن كل هذا علشان مينضحكش عليه..
ليه الناس بتفهم الطبيعه غلط..؟
ليه بيستغلوا النقطه الكويسه دى فى الغلط..؟

يعنى بجد أنا بستعجب من الفئه الأخرى اللى هى كالآتى...........

(أنا محدش يقدر يلفت إنتباهى ده مين ده يا ماما..محدش بيعرف ياخد منى ريق حلو..أنا بروح المكان الفلانى وصرفت المبلغ الفلانى..تخيلى بكام..رخيص..ده المبلغ ده أنا بصرفه فى ثانيه..وأنا بعمل وبسوى)..وهو ممكن يكون مش حاجه اساساً ..يتركنله فى جمب..

على أساس انه مش خايف على نفسه من الحاسدين والحاقدين وللا إيه مش فاهمه..
فى حاجات كتير كده مش فاهماها ..متخلفين دول وللا أنا اللى متخلفه علشان مستغربه..

هههههههههههههه حاجه والله تضحك ما تتنيل تسكت متتكلمش على نفسك كتير..محدش فايقلك أساساً..

مؤكد محدش هيثق فى كلامك حتى لو إنت صادق..

لإن خلاص إنت اصبحت شخصيه كثيره الكلام عن نفسها..

كثيره الثرثره من وجهه نظرهم..

وممكن..تصبح بلا هويه..مجهول الشخصيه..
يا ما هنشوف والله..
ماله التواضع جميل جداً..فمن تواضع لله رفعه..

مش قادره أسمى الفئه دى من الناس إلا متخلفين وسامحونى بقى..

أصلهم الحقيقه بيضايقونى وأنا معرفش أكون متضايقه من حاجه ومتكلمش..

أرحمنى يارب..واهديهم علشان انا معنتش ناقصه..

يا ساتر يا رب..

حياه بلا أحزان..

فكرت مريراً..ما الذى يصحب الأحزان الى ملكه فكرنا الخاصه وايضاً ملكه مشاعرنا..

كنت فى أول الأمر لا أعرف السبب..يمكن أن تكون غفله..عدم تقدير..أو عراك بما لا يشبه الحقيقه..

كنت أجد الحياه دائماً مع كل البشر مليئه بالصراعات والأوجاع..وأنا منهم أيضاً..

فى حاله إستغراب وفجأه..

لماذا نحن هؤلاء البشر لا ننظر إلى ما أعطانا الله إياه..؟

لماذا لا نعترف بنعمه الكثيره علينا..؟

لماذا نظل دائماً ماقتين على تلك الحياه..؟

فهل نريدها فى شئ..؟

وهل الدنيا تفيد بالأساس؟..سوى أننا نستخدمها كوسيله لبناء رصيد لنا فى الآخره؟

سؤال صعب جداً..إذا أدركه البعض منا بكاد لا يتحمله..

وماذا عن البعض اللذين ينكرون هذه النعم؟

نعم ينكرونها..بأى حق..بأى روح..بأى لسان؟

مساكين تلك الفئه من البشر..لا يستطيعون ادراك أن سر السعاده الحقيقيه هو (الرضا)..

الرضا فى كل شئ..

الرضا فى نقص المال..المأوى..القدر..الحزن..الإختبارات القويه الموجهه من الله سبحانه وتعالى..قله الحيله..هبوط سلطه..انحدار جاه او مال او اطفال..

أطلق نفسك من كل هذه القيوم التى تحتويك من كل الجوانب..

لا.. تحزن على مافاتك..

لا.. تنظر الى ما يملكه غيرك..

لا.. تشعر نفسك بالنقص..

لا.. تندم على شئ قد حدث فإعلم أنه لم يعد..

كن محباً للحياه ولكن كن حذراً.. لا تبيع نفسك لها..

لا تعطيها أدنى حقوق بأن تتحكم بك..

الحياه جميله فأنت الذى تحدد إن كانت هكذا أم لا بتحكيم العقول..

وأخيراً وليس آخراً..

السعاده الحقيقيه تكمن فى حب الله ورسوله وإتباع سنته..

ستظل مرتااااااااااااااااااح البال ما دمت تفعل هذا وحينها لا تفرق معك الدنيا..