CLICK HERE FOR BLOGGER TEMPLATES AND MYSPACE LAYOUTS »

الأربعاء، 2 مارس 2011

عــم القــــــــــــــذافى..




ازيكم الاول..واخباركم ايه فى الدنيا بعد الثوره..
انا متاكده ان شعوركم نفس شعورى اثناء وبعد الثوره..وحاسه بكلللل اللى حسيتو بيه لان ده اول حدث الحقيقه يحصل فى مصر وكلنا نفكر فى نفس التفكير ونحس بنفس الاحساس..
حتى احساس الحريه بعد الثوره بنسب متقاربه..

مفتحتش المدونه من زمان..كتير كنت ببقى عاوزه افتحها..بس مش عارفه ليه كل ما اجى افتحها صوابعى تبعد..

ماعلينا خلينا فى انكل القذافى اللى مدوخنا وراه وهيجيبلنا الضغط..
انا حاسه يا جماعه ان الراجل ده فريد من نوعه..يعنى فاقد كل شئ ربنا خلقه لاى انسان عادى..
فاقد الاحساس بالمسئوليه..متخلف..
دماغه متركبه شمال..سايق الهبل..
نفسيته مش متظبطه..عقله مش فى دماغه وبدالها حته طوبه..
ومنفوخ نفخه سوده لدرجة انى حاسه انه قرب يفرقع من كتر النفخ..
و........و..........و...........

فى كل بيان يطلع يقول كلام يجيب السكر يعنى لو مطلعش يبقى احسن يعنى
حقيقى انا بشفق على الشعب الليبى منه..وفى نفس الآن اضحك على طريقته يعنى راجل غريب من نوعه هم يضحك وهم يبكى..
مره يطلع يتكلم من توكتوك..والى الامااااااااام...
ومره يطلع من على السطح...وافرحوا غنوا ارقصوا..

يخرب بيت سنينك هتجيبلنا الضغط بدرى..

انا قعدت فى يوم مع نفسى كده ادور هو دماغه ليه متركبه شمال..
ولا هو عنده شذوذ عقلى مثلاً..
مقدرتش اوصل لحاجه..وبصراحه مش عارفه حله ايه..
مش هيسكت الا لما قوات اجنبيه تدخل وتحتل البلد وشعبه يبقى فى الضياع زياده..
انا مش عارفه بصراحه حله ايه..لا نملك للشعب الليبى الان سوى الدعاء بالنصر مثلما نصرنا الله..
والتخلص من الفاسدين والدمويين كما خلصنا الله سبحانه وتعالى من كل فاسد وظالم ودموى..
قولو آااااااااامين..