انا تحت الخط وللا فوق الخط..؟

السلام عليكم ورحمة الله وبركاته..
اهلا بيكم الساده المدونين ..عاملين ايه..؟
اتمنى تكونوا بخير دايماً..انا غبت كتير انا عارفه وكل بوست اقول نفس القصه غيابى وكذا وكذا..لان طبيعى كل مره اكتب بوست واغطس ههههههههه..ربنا يسهل الاحوال ومغطسش المرادى كمان..عموما..سيبوها على الله..
نرجع بقى لموضوعنا..الخط اللى فوق والخط اللى تحت..!!
اممممممم..يا ترى انتوا تحت الخط وللا فوق الخط وللا فى النص..؟

ايه حكاية الخط ده..؟انتى بتتكلمى عن ايه؟!!!
وايه ده اللى فوق وايه ده اللى تحت..؟!!
اقولكم انا ايه حكاية الخط ده..
انا بتكلم عن خط الفقر..
اكيد كلنا عارفين بالاجماع ان فى ناس كتير فقيره..يمكن تكون انت منهم او انتى منهم..ده اكيد كلنا لازم نمر بظروف اياً كانت..
وكلنا كمان عارفين ان فى ناس تحت خط الفقر..

طيب محنا عارفين ايه الجديد..؟
الجديد ان فى ناس تحت تحت خط الفقر مهلمش صله بالخط ذات نفسه..
ماهى حاجه تنرفز..لما يكون فى تباااااااااين واضح جداً فى المستويات والطبقات..

يعنى ايه..؟

يعنى سمعتوا عن فلان اللى بيملك 66 مليار جنيه وشوية كسور..
هى من وجهة نظره شويه كسور..
شوية الكسور دول يجى مثلا من 5 : 6 مليون..
بالذمه مش حاجه تضحك..
متنرفزتوش صح...؟

بس انا مزاجى انرفزكم النهارده..
سمعتوا عن اسمها ايه دى اللى عملت زفاف بـ 55 مليون وطيارات للمعازيم علشان توصل المعازيم الفندق وترجعهم تانى بيوتهم.. ههههههههههههه..انا اسمع الحقيقه عن الميكروباسات والبيجو..انما طيارات لأه لسمه متمدنناش الحقيقه..
انا عارفه ان القصه قديمه..بس اعمل ايه حاجه ومش قادره انساها..لما يتعمل زفاف بـ 55 مليون جنيه اومال الناس التانيه دى مش لاقيه تاكل ليه..
لما الفلوس كتييييييييييره قوى كده والناس مش عارفه توديها فين..
الـ 55 مليون جنيه دول يبنوا مستقبل بلد بأكملها..فى الحين الشباب مش لاقيين فرص عمل..
فى حين الارامل اللى بياخدوا ملاليهم..طيب وهتحسن دخلها ازاى..هتنزل تشتغل مثلا؟
فى حين ما فى موظفين كتير عندهم اولاد وبنات مش عارفين يعيشوا ومش عارفين يصرفوا على دراستهم ..
مش عارفين ياخدوا حقوقهم..
مش عارفين يناموا مرتاحين البال..
مش عارفين ..مش عارفين ...كتير قوى..

طيب احنا واجبنا ايه حضرتك يعنى..عماله من ساعتها تتكلمى كتير فى حاجات متخصناش..

لأ....بالعكس انا شايفه ان انتوا الاساس ..

لما الواحد يكون ربنا فاتحها عليه وكارمه يصرفها فى الفاضى وللا فى حاجه مفيده..
انا شايفه ان لو فى حاجه انت شايف انك مش محتاجها..اتصدق بيها حتى لو بجنيه الجنيه ده صدقونى بيفرق كتير قوى قوى..
الجنيه دلوقتى قلوا قيمته وبقى معدن..بس انا شايفه انه حتى لو صفيح عند ناس كتير هيفرق معاهم..
ومتقولوش احنا منعرفش حد علشان نساعده..
فى دلوقتى مليوووون جمعيه خيريه على اى جمعيه وحط اى مساعده ..
محدش هيقوللك ده قليل وللا كتير..
كفاية دعوه حلوه من حد كان محتاج قوى.. انت فى امس الحاجه ليها..وربنا يكرمك اكتر واكتر وتقول ياربى انت اكرمتنى علشان كذا وكذا..
وافتكر دايما ان الصدقه قبل ما تروح لاهلها ..تقع بين يدى الله تعالى..
اتمنى يكون فى ايجابيه اكتر..خلاص كلها 4 شهور ويوم اليتيم يكون جه..4 شهور بعيد..لكن فى ثانيه هتلاقى الـ 4 شهور دول عدوا بسرعه الريح..ومن غير يوم يتيم احنا لازم نفتكرهم فى اى وقت..
فى نهايه كلامى اتمنى اولا مكونش ازعجتكم بحديثى ده..
ثانياً..مهما ذادت الكنور احنا فقراء فى الدنيا اغنياء بالله..
وسلامى للجميع..